Sangkahna
1921-24 dong Tedim Kumpi Kawllai sang-ah tankhat pan tanli sim hi. 1923-30 dong Tedim Anglo-Vernacular Middle School ah tanli pan tan 7 dong sim hi. 1930-33 dong Sagaing khua Manglai/Kawllai Kumpi saang-ah tan 8 pan kah a, tan 10 Additional English tawh zo hi. 1933-41 dong Yangon University Teacher’s Training College ah kah hi.
Nasepna
1933-36 dong Falam ah Apprentice Clerk seem hi. 1936-39 dong Chin Hills District, Falam-ah Sub-Inspector of Schools nasep leh, Falam saangpi-ah JAT tawh thuah hi. 1939-41 dong Yangon University Teacher’s Training College akah sung University Training Corps ah kumnih bit lut hi. 1941 May kha a kipan Tedim gam Pyinya-uk leh galkap lam, gam ukna lam leh mipi kikal ah Civil Affairs officer seem hi. Thaangpi phualpi in nei a lamtawh nang, kumpi vanpuak nang, sikkhauto, Supply vanpuak nang, akisam khempeuh kiseemsak hi. 1942 kum in Japan galdo nangin Western Chin Levies phuankhia a, Company Commander tavuan seem hi. Tua hun a kipan in Allied Forces-te leh Civil Adiministration kawm in, Political Laiasion Officer, Treasury Officer, Quartermaster, Intelligence Offier, leh Interpreting Officer-te seem kawm hi.
1943 kum in Assistant Division Education Officer za kipiak hangin, saangte kikhakkhin ahih manin gam-ukna lam ah hunbit in seem hi. Tedim vuandok leh Levies galkap ukpi nasep athuah khawm Vuandok Kelly tawh galmai teng-ah pai kawikawi hi.
1944 March kha in, Mangkang galkapte Tedim-Tonzang-Imphal lam-ah nungkit a, Tedim a nusiatni in, Vuandok Kelly tawh galgam lam ahi Saizang/Kaptel lam manawh in galguk tawh Japante donang vaihawm dingin lehpai a, Saizang leh Phaileng khua kikal giahbuuk ah a u, Ukpi Pu Thawng Za Khup tawh Japante do kik nang kam kikum in, aki vaikhak khit ciangin Manipur-gun kantan in Kaptel, Heilei, Suangzang, Sa-ek, Khuakhing, Lennupa gamsung-ah phualsat uh hi.
Tua hun a phuah la –
(a) Huihkhi lan dang seino gual aw,
Ciin ho nem tuang nusia’ng ee.
(b) Agal pan mitmei suan ing e,
Ka siallum tawh hei ing ee.
Ciin ho nem tuang nusia’ng ee.
(b) Agal pan mitmei suan ing e,
Ka siallum tawh hei ing ee.
Tua Lennupa gam sungah Sukte Independent Army (S.I.A) phuan hi. 1944 June kha in Japan(CDA)te phualpi Kapel sim uh a, avekin hingmat in Aizawl khua-ah puak uh hi. Kaptel khua-ah S.I.A mi kibehlap a, Sep 11, 1944 ni-in Manipur-gun kantan in Mualbeem khua la hi. Tua lai-ah C.D.A makai Pu Za Bik zong hingmat in, Imphal ah puak hi. Mualbeem khua a gualzawhna leh galsimlai nadingte vaihawmna pawi ah Pu Sing Lian in Pu Thawng Cin Thang pahtawina la phuak hi.
(a) Gual in taitai hong ci ding a,
dam dildial in hei ing e.
(b) Suktui lunmang hawmsiam kom in,
sul ah ong hei kik ing e.
dam dildial in hei ing e.
(b) Suktui lunmang hawmsiam kom in,
sul ah ong hei kik ing e.
Oct 14, 1944 ni-in Englang kumpi in Pu Thawng Cin Thang pen ABRO Commission No. 1446, Staff Lieutenant za pia a, galvai leh gam-ukna vai tawh thuah khawm hi. S.I.A makai sungah akihel, Pu Sing Lian leh Pu Suang Lian-te sawl in, Sihzang makai Pu Vum Ko Hau leh Pu Awn Ngin-te tawh kimusak in, Japan galkapte do nang vaihawm khawm uh hi. 1945 kum sungin Burman Frontier Service-ah vuandokza kipia a, 1945-46 sung Tedim, Falam leh Hakha gamte-ah vuandok seem hi. 1947 kum in Pinlong thukimna letmah thuh dingin gam makai-te ngaihsutna pia hi. Supreme Council of United Hill People kipawlna ah khamtungmi upa 6 sungah khat in kiheel hi.
Kawlgam gam-uknang thukhun(Constitution) bawlna ah Zomi buppi in Deputy Counsellor dingin teel a, a san loh hangin Deputy Councellor mah kiseemsak veve hi. 1947 April kha a Maymyo (Pyin O Lwin)a kibawl Rees William’s Frontier Areas Committee of Enquiry ah Advisor seem hi. 1947 kum sung mah in Kayah gamsung Sawbwa asikhat tangin panmunlen ding ateelsak commission mi thum lak-ah khat in kiheel hi. Bogyoke Aung San makaihna tawh Soronta Villa Rehabilitation Conference, 1947-ah upa khat in kiheel hi. 1947 kumsung kawlgam suahtakna ngah ciang ki-uk nang sepkholh nate ah Zozum nasep ding geelkholhna Atuanvuan (Additional Secretary) za tawh makai seem hi. Jan 4, 1948 suahtakna ngah hun a kipan, Zozumpi ah Atuanvuan(Secretary) seem hi. Jan 4, 1949-54 sung Zozumpi atuanvuan, Ministry of Home Affairs-ah OSD, Hantharwaddy District OSD leh ADC (Additional District commissioner) nasep nate seem hi. 1953 kum in Tedim Saangman Rev. F.O Nelson Kawlgam hong lutkik theihnang vaihawm makaite tawh thu kikum in hanciam hi. 1954 kum pan in Zogam, Falam Mangpi seem hi. Mangpi asep sungin Zomite lunggulhpen ahi Thau Licence leh Dol Licence tampi piakhia hi. 1958 kum pan Zogam Menzi seem hi. Caretaker Govt (General Ne Win) hun sungin thau khempeuh kikhawm ding cihthu a om ciangin, “Keima piaksa hi. Zomite in hih thaute tawh kumpi langpang ngei lo ding ci-in tavuan kala hi,” acih manin thau kikhawm nawn lo hi. Zogam menzi nasep leh Session Judge tavuan seem khawm hi.
1964 kum in Zomi pawlkhat kumpi langpang ding akithawi-te amah mah in zol kik zo hi. 1966 kum June kha in, Mandalay Commissioner, 1969 kum in Kachin State-ah Menzi, 1972 kum in Home Ministry, Govt. Servants Screening Board-ah upa seem hi. April 16, 1974 ni-in pension la hi.
Thiripyanchi Pu Thawng Cin Thang in January 18, 1986 in Yangon-ah hong nusia hi.
- Thiripyanchi (သီရိပ်ံခ်ီ) cih pen Kawlgam kumpite piak pahtawina minlian khat hi.
- Source: Saizang Tuiphum Pawlpi, Daimond Jubilee (2003)