Saizang khuapi a teeng Pa Vial Khaw Hau leh Nu Khup Zo te sung pan Oct 20, 1970 ni-in Saizang khua-ah suak hi. Pianpih u nau (9)lak-ah anautumpen hi.
Pianpih teng –
1. Pa Lam Khaw Gin
2. Nu Nian Don Cing
3. Pa Tual Za Langh
4. Nu Pum Heh Cing
5. Siapi Pau Za Nang (BA, B.Ed)(TEO)
6. Nu Ciin Sial Cing
7. Nu Tual Lam Dong Cing
8. Sianu Cing Sen Zen (B.Th, M.Div)
Sangkahna
Saizang Middle school-ah tan (3) dong kah hi. Acdemy for Development of National Groups, Sagaing pan 1985 kum in tan (10) zo hi. 1991 kum in Teachers’ Training College, Mandalay pan B.Ed ngah hi.
Kumpi nasepna
1985 pan 1990 sung teng P.A.T za tawh Khiangzang, Saizang, Zimte khua-te ah seem kawikawi hi. 1991 pan 1995 dong J.A.T za tawh Zimpi, Kaptel leh Saizang khua-te ah seem hi. Nasep kawm mah in sangkah zom a, 1993 kum in University of Distance Education, Mandalay pan BA (Geography) ngah hi. 1995 kum in kumpinasep sangsia pan tawlnga hi.
Pasian tung ki-ap
Kumpi nasep sungin Saizang Tuiphum Pawlpi ah Joint Secretary (1994-95) sung seem a, nasep akhawl khit ciangin Laisiangtho sangkah dingin India lam kuankhia hi. 2003 kum in Eastern Theological College, Jorhat, India pan Bachelor of Divinity ngah hi. Asangkah sungin pilna deih mahmah khat ahih mah bangin Haggai Institute ETC, Jorhat pan in Advace Leadership Skills, July 2000 ni-in hong zo hi. Unau Christian Fellowship, Jorhat ah zong Secretary (2001-2002) sung seem hi. B.D azawh khit ciangin Yangon lam hong zuansuk a AZBC Pawlpi, Yangon ah Office-in-charge (2005-2006) sung seem hi. Yangon pan in Philippines ah pilna sinthuah nading Pasian in vaihawmsak a, 2009 kum in Union Theological Seminary, Philippines Christian University pan Doctor of Ministry hong ngah hi. Sangkah sung 2008 kum in Ciimnuai Zomi Fellowship, Philippines ah Joint Secretary leh Treasurer thuah khawm hi. Philippines Christian University ah asangkah sungin Globalization in the greater Mekong sub-region (Sep 17, 2008) leh Guidelines for Biblical Interpretation (Aug 6, 2008) traning-te zong hong zo hi. Nov 23 – Dec 2, 2008 in Singapore leh Malaysia ah doctoral research bawl dingin pai hi.
Dr. Zam Len Mang pen Saizang khuapi pan biakna lam ah Doctor a ngah masapen khat hi.