Tedim khua a teeng Pu Pau Za Kam leh Pi Lian Za Cing-te tanu upen Pi Man Kaih Niang tawh Oct 20, 1945 ni-in kiteeng in Topa piak tapa nih leh tanu nih nei uh hi.
Saangkahna
Asaangkah theih a kipan Tedim Primary School leh Tedim Anglo Vernacular Middle School ah kah a, March 1933 kum in tan 7 zo hi. Tan 7 asimkum mah in Tapidaw suak in kituiphum ahih manin Saizang khua pan tuiphum asuak masa pawl hi.
Galkaptumna
Tan 7 azawh phet in Tedim gam-uk Vuandok Blackquer in abawllung suih siamna pakta lua ahih manin azum-ah apprentice clerk(lai-at) seemsak hi. Tua hun laitakin Sukte gam, Leitawhtan khangsiah galkaptum ding akikhahtan hunsung ahi hi. Recruiting Officer, galkap dong a hongpaipa kiangah, “No Mangkang kumpite in KamHau’ gam leh Sukte’ gam ah aphiangsiah a kibang in dong hilo nahi uh hiam? Mikang kumpite in thuman thutak tawh gam ka uk uh cinapi uh cin, banghang in galkaptum ding na ngawn, saan nei a, saangloh nei nahi uh hiam?” ci-in adot leh Officer-pa in lamdangsak leh pahtak thuah ahih manin galkaptum theih dingin lapah hi. Leitawhtan khangsiah Sukte gammite galkaptum theih nang lampi honsakna hong suak hi.
Galkap sungah Course tuamtuamte sangzawh mahmah ahih manin asawt lo in Havildar ngah a, 1939 kum in Jemadar ngah hi. Kawlgam sung bek hi lo, India gam Bangalore High Level Education Course leh Deradun ah Motor Transport Officer Training School ah kah hi. Kimawlna lamah zong kanteh kanhat mahmah in Kawlgam galkap record-ah sauveipi ademzo om lo hi. Bawllungsiam in zong minthang a, Kawlgam galkap team-ah kiheel hi.
1941-43 sung Western Chin Levies ah Adjutant sem hi. India gam Kitchenar College (Officer’s Training School) ah kipuak a, 1944 kum in ABRO Commision Lieutenant ngah hi. Captain asuah khit 1945 kum in Tedim a kihongthak Second Battalion the Chin Rifles ah seem hi. Tedim hong tunzawh asawt lo in Major in aza khang hi.
1947 kum in Seconnd Chin Rifles Mingaladon-ah 2/IC asep laitak Salisbury (UK)ah Senior Officer Trainning Course kah in, hong tunkik ciang Second Chin Rifles mah-ah Commanding Officer seem hi. Commanding Officer asepkawm mah in, Cantonment Authority leh Station Officer seem khawm lai hi.
1948 in Colonel ngah a No. 1 Light Infantry Brigade-ah Brigade Commander seem hi. Bago leh Taungoo Area Commander leh Bago Division Commision thuah hi. Zomi sungpan Colonel ngah masapen ahi hi. 1951 in galkap sungpan pension la hi. Tua zawh ciangin BawDwin No.1 Mining Corporation ah Chief Time Keeper seem in, 1975 ciang pension la hi.
Colonel Dal Za Kam in Sep 9, 1977 ni-in Pasian ang hong zuatsan hi.
Source: Saizang Tuiphum Pawlpi, Daimond Jubilee (2003)